PISHA E BABËS, JO VEÇ HIJE PËR VARRET…
Nga: Ramiz LUSHAJ
ALI MUS LUSHAJ
PISHA E BABËS, JO VEÇ HIJE PËR VARRET…
Kushtim babës tim, Ali Mus Lushaj, që prej 23 korrikut 2012 prehet në varreza të qytetit alpin të Tropojës, Malësisë së Mirë.
30 vjet ma herët e mbolli një pishë për të ruajt varrin e vet
Po ajo u rrit aq e madhe sa iu dhimbt’ dhe e la hije për të tjerët.
Zemra i pushoi në mesditë në Tiranë
E shpirti i doli në mëngjez në Tropojë
Në mes njerëzve të gjakut të ardhun nga disa kontinente
Në mes veteranëve të luftës e të punës që jetnuan disa epoka
I rå autostradës, andej nga Kosova,
U përcoll me homazhe aty nga pallati “Dardania”,
Në qytetin e Bajram Currit i renduan kunora
E shkoi pranë pishës,
Krah babës së vet, Mus Zenelit,
Me fytyrë nga lindja e diellit
Për të pritur ky stërgjysh i mirë mëngjezet…
Mbi trupin me plagë të luftës i çelnin trandafila
Jeta nuk i niste te e hana e as nuk i mbyllej te e diela.
E shihja tek tretej këso kohe porsi qiri në ditë të verës
E ndjeja se po më ikte këso bote porsi dielli i vjeshtës.
Nuk më besohet se të dielën e 22 korrikut 2012 do të ikte…!
Derisa i shoh përmallshëm gjërat e tij si relike…
Ai, si e thoshte me sms një miku im poet, rå si një lis.
Po. Bash si një lis nga shkambinjtë e kohës…
86 degë iu banë memorial i tij
E la një lisnajë të gjakut e të pragut të vet…
Tashti ka me e rrit edhe pishën që vetë e mbjelli…
Ai rri në zemër të tokës,
Pisha lisnon nga qielli.
Të gjithë e duan babën e vet
Po për për mue je ma i miri.
E di baba jem:
Se nga fundi i tokës e maja e qiellit
Edhe në mesditë, edhe në mesnatë,
Na i lshon rrezet e Diellit…
Tiranë, më 4 gusht 2012
|
|
Tweet |